Både musikk og friluftsliv! Kan det bli betre? Voss kan by på begge delar. Dette er både ein vintersportstad og ei kulturbygd.
Skap gode minne i lag med gode vener!
På Voss folkehøgskule har me lange tradisjonar for både musikk og friluftsliv, og kombinerer begge i ei unik linje! Her får du spele konsertar, stå på scenen og dra på turné. I tillegg får du oppleve variert friluftsliv i verdas vakraste bygd: ski- og idrettsbygda Voss!
I musikken fokuserer me på samspel. Det å spele saman med andre gir uvurderleg musikalsk læring. Du utviklar dine instrumentale ferdigheiter, utvidar det musikalske repertoaret ditt og aukar sjangerforståinga di. I varierte bandprosjekt utviklar du evna di til å lytte, trekkjer linjer mellom teori og praksis, og opparbeider øvingsrutinar og samarbeidsevner i eit fellesskap. Du får også arbeide med låtskriving og arrangering, bruke studio og MacLab, samt planleggje og gjennomføre konsertar.
I friluftsliv ligg fokus på samhald, meistring og læring. Gjennom vinterhalvåret har me periodar med variert friluftsliv: alt frå fjellturar, hytteturar og teltturar til alpint og snowboard i bakke og off-piste. Det blir mange dagar på snø i løpet av vinteren. Som elev på Voss fhs får du årskort i Voss resort sin gondol og skisenter. Dette ligg ein liten gåtur frå skulen! Du får og prøve deg på flyging i Voss Vindtunnel! Eller kva med leik og trening i Vossabadet? En tur på Nærøyfjorden med kajakk og telt? Og sjølvsagt blir det tid på linja til bålkos med gitar og allsong. Målet er at du skal få prøve mest mogleg forskjellig, og klassen får sjølv vere med å påverke kva me skal bruke tid på.
Dei frilynte folkehøgskulane har verdigrunnlag som ikkje tek utgangspunkt i eitt bestemt livssyn. Dei vil gjerne ha elevar med ulike interesser og livssyn.
